Ռոս Բաղդասարյանը՝ սկյուռիկների խմբի ստեղծողը

Ռոս Բաղդասարյանը ամերիկացի դերասան, երգիչ և երաժշտական պրոդյուսեր էր, «Էլվինը և սկյուռիկները» հորինված երաժշտական խմբի ստեղծողը։ Երեք սկյուռիկների փոխարեն ինքն էր երգում՝ ձայնագրելով ձայները և ապա արագացնելով ձայնագրությունը, իսկ ելույթներում օգտագործում էր տիկնիկներ։ Կերպարներն անվանվել էին «Լիբերթի Ռեքորդս» ձայնագրման ընկերության ղեկավարների պատվին՝ տնօրեն Էլվին Բենեթի, հիմնադիր և սեփականատեր Սայմոն Ուորոնքերի և գլխավոր ինժեներ Թեոդոր Քիփի։ Հետագա անիմացիոն սերիալում երկխոսությունները նույնպես ինքն էր հնչյունավորում։

Բաղդասարյանը մահացավ 1972 թ., սակայն 1980-ական թթ. նրա որդին՝ Ռոս Բաղդասարյան կրտսերը, վերակենդանացրեց գաղափարը։ 2007 թ. որդու պրոդյուսերությամբ էկրան բարձրացավ «Էլվինը և սկյուռիկները» ֆիլմը։

Լուսանկարում ժպտացող տղամարդը գրկել է երեք մուլտհերոս սկյուռիկների մեծ պատկերը՝ «Սայմոն», «Էլվին» և «Թեոդոր» անուններով։