Օձագլուխ եկեղեցական գավազան
Հայկական եկեղեցական գավազան՝ 1700–1825 թվականներից։ Այն քահանաների համար նախատեսված արծաթյա ոսկեզօծ գավազան է՝ կազմված գլխից և երեք կոկոնաձև մասից։
Գլուխը պարուրաձև թեքված օձի վիզ և գլուխ է՝ ծածկված գունավոր էմալով արված թեփուկներով։ Օձի ծնոտները լայն բաց են, երևում են ատամների շարքերը և երկար լեզուն։ Գլխի ներքևի մասը արծաթե բարակ թելերից հյուսված զարդ է (ֆիլիգրան)։ Երեք կոկոնաձև մասերը բաժանված են չորս հատվածի և զարդարված են համաչափ դասավորված ծաղկային նախշերով։
Լուսանկարում գավազանի գլուխը և մեկ կոկոնաձև մասը ամրացված են թափանցիկ հենակի վրա, մյուս երկուսը դրված են կողքին։
